عدم النوم في الشعر الشايقي

اول بالتبادي دار اعتزلكم عن العنوان



وبالصدفة وفي ذات ليل كت بسمعلي في كم غنيوة كدي ورا بعض ولفت انتباهي فيهن انهن كلهن وارد فيهن كلمة ( الليل) والكلام دا هو زاتو انا لاحظتلو بليل وبقيت اسأل رويحتي ياربي لية كلمة الليل دي قالوها كتير كدي وما لقيت اجابة وبعد داك اتعمدت افتش الكلمي دي ولقيتة كتيري خلاص , ياربي السر يكون شنو؟

بعدين لاحظت برضو حتي الزول الخلاص ربنا قسملو ينوم تلقاهو يهلوس لامن الصبح يصبح

كدي اكنكن تعالو ناخدلنا كم نموزج ونفكر ياربي خلق الله دي كانت ماله كدي !!! :

سمعتو الاستاذ صديق احمد لما قال :-

لا ليل لاصباح طعم مالي بدونك

ودي يبقالي اللت الراحل عبدالله محمد خير , وتعالو نشوف عزالدين شكري قال شنو:

طول ياليل من ظلم الحبايب ديل

وتعالو اكنكن نشوق الاستاذ السر قال شنو:

مالك طلت يا ليل الحزانة وفيك ازداد سهرنا وزاد شقانا

وتاني تعال نشوف السر قال شنو في قصيدة اوعك تغيبب يا طيف:

ياطيف انت عزاي في محنتي القاسي قاسمني سهد الليل واشرب معاي كاسي

وتعالو نشوف صديق في غنية الساعه كم قال شنو:

لي فراق الجاهلة مهتم داير اضوق النوم واحلم ياخي كلمني الساعه كم

الغنيوات والكتابات كتيري عن الليل والسهر كدي تعالو نشوف الهلوسة والهضربة قالولنا فيها شنو:

نبدا بي غنوة محمد كرم الله القال فيها

لو جربت يوم نوم الهضاريب والسهر ويبقالي دي الت محمد سعيد , وتاني في غنوة معتصم ابرهيم (رسالة عتاب) يقول فيها :

الليل بشيلو مع الهضاريب هلوسه

وتاني قصيدة محمد سفلة البيغنيها ود النصري البيقول فيها :

ليلي طولو وعرضو اهلوس والنجوم تشهد نحيبي

وتاني قصيدة الحبيب البغنيها الزول الرائع عثمان عبدالعظيم البيقول فيها :

ليلات الهموم ياما ضيوفه جماعه لكن النهار شايلنو صفقة وعرضة

وقصيدة حسن النوبي البيغنيها بابكر البرصة البيقول فيها:

ناحت بواكي الشوق طول ليلا تنبح هو عرجت خطاول الحظ واصلا مشيها اشو

واللت النجار الاسمها الليل يطول:

الليل يطول وانا وحدي فيهو براي اجول .

بجيكم صاد...